सिजनको बेला सुनको अभाव

व्यवसायी चिन्तित

१९ कात्तिक, काठमाडौं । तिजको बेला ग्राहक नभेटेर हैरान भएका सुन व्यवसायी अहिले बेच्ने कुरा नै नभएर निराश छन् । ऊबेला भाउ महंगो थियो । बढेको भाऊमा सुन्न किन्न धेरै उपभोक्ता तयार भएनन् । तर अहिले भाउ घटेको छ । तिहार र बिहेको सिजन आउन लागेको कारण सुन पसलमा उपभोक्ता ओइरिन थालेका छन् । तर उपभोक्ताले खोजे अनुसार पसलमा सुन छैन ।

बाणिज्य बैंक मार्फत वितरण हुने सुनको कोटा १५ किलो मात्रै छ । तर अहिले बजारमा माग यसको तीन गुणा बढेको व्यवसायीहरुले बताएका छन् । पहिले भाउ बढेर व्यापार भएन, अहिले सुन नभएर । पटकपटक मारमा पर्दै आएका सुन व्यवसायीले वितरण बढाउन राष्ट्रबैंकसित आग्रह गरेका छन् ।

‘प्रयाप्त सुन नपाउँदा कारोबार हुन सकेको छैन’ नेपाल सुनचाँदी व्यवसायी संघका अध्यक्ष तेजरत्न शाक्यले भन्नुभयो -’वितरण प्रणाली प्रभावकारी बनाउने पहल गरिदिन राष्ट्रबैंकसंग आग्रह गरिएको छ ।’

तर बाणिज्य बैंक मार्फत वितरण हुने सुनको कोटा १५ किलो मात्रै छ । त्यसमा पनि माग गरेको बेला पाउने अवस्था नरहेको व्यवसायीले बताएका छन् । माग अनुसार वितरण हुन नसक्दा भाउ पनि झण्डै एक महिना यता खासै घटबढ भएको छैन । सुन बैंकमार्फत ल्याईने भएपनि चाँदी भने व्यवसायीले आफै ल्याउने भएकाले चाँदीको वितरणमा भने कुनै समस्या छैन । माग र वितरण सन्तुलित रहेकाले चाँदीको भाउमा पनि लामो समय सम्म खासै अन्तर परेको छैन ।

तीजको बेला तोलाको ६१ हजार नाघेको सुनको भाउ अहिले ५९ हजारको हाराहारीमा छ । सुन कारोबारको लागि अहिले उपयुक्त सिजन हो ।

source-onlinekhabar