सिकार आरोपमा १३ पक्राउ

कपिलवस्तु , कार्तिक १९ - सिकार गरेको आरोपमा प्रहरीले दुई थान दुईनाले बन्दुकसहित यहाँ १३ जनालाई पक्राउ गरेको छ । हतियारसहित ज१ज २९ नम्बरको गाडीमा सीमा क्षेत्रको वनमा गइरहेका बेला उनीहरूलाई गस्तीमा रहेको इप्रका गणेशपुरको टोलीले पक्राउ गरेको हो । राति करिब १० बजे जिल्लाको सुदूर पश्चिम गणेशपुर ७, गेडुवा जोतबाट उनीहरू पक्राउ परेका थिए । पक्राउ परेकाका आफन्तले छाड्न दबाब दिँदै बिहान कृष्णनगर-चन्द्रौटा सडक खण्डमा केहीबेर भाडाका सवारी साधन बन्द गराएका थिए । केहीबेर कृष्णनगर बजार बन्द भए पनि बिहान ८ बजेतिर खुलेको थियो । उनीहरूसँग बन्दुकसहित बन्दुकमा लाग्ने ७ थान गोली र एक थान चक्कु पनि बरामद भएको जिल्ला प्रहरी प्रमुख उपरीक्षक राजेन्द्र ढकालले बताए । बरामद बन्दुक भने सरकारी अनुमति प्राप्त लाइसेन्स भएको बताइएको छ । सरकारी वकिलसँग राय लिएर अगाडि बढ्ने उपरीक्षक ढकालले बताए ।

Source-ekantipur